前晚快活谷跑馬好旺場，好多馬主入場為愛駒出賽打氣，但結果「有心栽花花不開，無心插柳柳成蔭」。港交所主席夏佳理（Ron）同愛妻夏安麗一心諗住愛駒「超班」真係可以超班勝出，可惜愛駒臨場表現失準，跑到無晒影，相反立法會議員林大輝嘅愛駒「極奇妙」，喺連練馬師都唔睇好嘅情況下跑第二，帶挈大輝贏得廿幾萬獎金。
大輝話，練馬師早就批死「極奇妙」唔得，於是打定輸數，只係買咗一百元連贏全餐及五百元位置，點知跑到第二，真係極奇妙，位置派彩有一百四十元，為佢贏萬多元，另外再分廿幾萬賽事獎金。原本大輝名下有四匹馬，但現時只剩番兩匹，稍後會買多一匹。大輝話，現時工作太忙，無乜時間入馬場，所以三匹馬已經夠晒數。
至於阿Ron，對「超班」好有期望，前晚見佢與太太、練馬師告東尼睇到聚精會神，「超班」初段都保持到第四、五位，以為留前鬥後啦，但跑跑吓竟然力不從心，畀「卡樂Ｂ之父」戴德豐嘅「和諧大使」勝出。