本文重點
近期港股重拾升軌，邁向二萬二千點大關，新股紛紛乘勢出擊，按慣例好多大孖沙都會抽埋一份，凍結大量資金。新世界主席鄭裕彤尋日喺工商界酒會現身，問佢有無抽新股玩吓？彤叔答話：「一隻隻啦，（啲新股）都幾好，但招股價就定得好貴，唔係賺得好多囉！」
好多人話境外熱錢流入帶旺港股，但彤叔認為，香港本身都大把銀紙，銀行水浸，加上整體經濟好番啲，港股無辦法唔升。對於新鴻基地產旗下尖沙咀環球貿易廣場發生
槽工作台下塌意外，彤叔話現時新世界旗下樓盤工程都好小心，雖然自己唔係好熟悉建築運作，但他知道工業安全措施好重要。
吳文華酒會多到去唔晒
近期十‧一酒會多到去唔晒，立法會秘書長吳文華（Pauline）就好醒目，話會篩選吓，唔會個個去晒喎，所以唔會好辛苦。Pauline早前去完法國巴黎同一大班中學同學敍舊，玩得好開心，佢希望今後每年可以搞一次敍會，等大家唔使咁生疏。Pauline充夠電，立法會十月開鑼之後，就有排佢忙嘞。