立法會內呢個建制派「協助執政大聯盟」，將由最疊馬嘅民記做牽頭角色，定期擺下鴻門夜宴，本來最快今個月底又再開飯，但可能為遷就立法會四川團，所以敲定十月中聚首。據悉，大聯盟為免自製標籤效應，不設召集人角色，各黨派平起平坐，以圓桌會議模式運作，初期閒話家常，磨合關係，年底就會入正題，一起食大茶飯。

「金勞詹」詹培忠提醒大家，呢個建制派合作新概念，叫「協助執政大聯盟」，唔係「執政大聯盟」，港府施政有德有節，大聯盟基於愛國愛港嘅大原則，為咗香港市民嘅利益，會捱義氣從旁協助一把，但係，如果煲呔曾失政失德，大聯盟無義務護航，三十六位議員仲可能會集合力量，一齊逼港府反枱咁話。咦，以港府嘅政績紀綠，大聯盟咪要成日動刀動槍？

望發揮影響力

金勞詹仲強調，呢個大聯盟唔係旨在挑挑剔剔，招招積積，亦唔係想向特區政府分權，佢哋走埋一齊，只係想發揮到足以左右大局嘅影響力，真正做到啲嘢，金勞詹話，咁樣做議員先至夠意思喎，好似想暗示依家三十六個建制派議員散修修，無厘氣勢。

現時立法會內嘅建制派，分為民建聯、自由黨、工聯會、專業會議、五散人、詹Sir二人組等組合，再加五名無黨派獨立議員，過往佢哋各家自掃門前雪，今次突然要搞「協助執政大聯盟」，唔使講梗係有人喺背後發功，為港府極之重大、尤其觸及中央底線嘅敏感政策做定護航保護網。不過，說易行難，建制派平時合力撐政府都唔易做到，更何況係一齊炳港府！「協助執政大聯盟」招牌夠晒大，最終做到啲乜，唔使幾耐就有公論。