老婆面前小男人

卓妮尋日上午心血來潮，入去大樓行番轉，立即就有意外收穫，撞到阿涂同阿Sue喺裏面影婚紗相。平日喺立法會聲大夾惡嘅阿涂，喺拍照期間對未來老婆千依百順，對攝影師嘅擺位同表情要求亦有求必應，證明愛情嘅魔力真係好大。

阿涂同卓妮講，佢同阿Sue都係大忙人，幾經辛苦先就到尋日影婚紗相，晨早七點鐘就開工，去邊度影就任由攝影師擺布。佢哋首站去咗阿涂讀港大時住過嘅大學宿舍，撞到喺宿舍做咗幾十年嘅一位阿嬸，賺咗兩封利是。之後佢哋落咗中區，攝影師忽發奇想提議入立法會大樓內取景，先至促成今次創舉。下午佢哋又去咗海灘同太平山頂影相，夜晚如果仲有時間，會再兜番落立法會大樓外影夜景，玩足一日，行程仲緊密過立法會開會。

卓妮