本文重點
高等教育界尋日喺尖東香格里拉酒店舉行聯歡晚宴，全城大專院校嘅正、副校長雲集，話題離不開傾吓「撲水」心得。公開大學月前首次參加政府配對補助金計劃，三扒兩撥籌到逾億元，公大校長梁智仁尋日爆出「吸財」秘技，原來係多得以前行醫時醫好唔少人，病人投桃報李，將錢捐畀公大作答謝，最大筆捐款有成二千萬元，呢個世界真係好心有好報！
港大校長徐立之、浸大校長吳清輝、城大校長郭位、仁大校監胡鴻烈、科大校長陳繁昌、公大校長梁智仁等，尋日齊集宴會廳舉杯暢飲。卓妮同梁校長講起籌款心得，佢話多得前公大校董會主席李業廣人脈夠廣，「吸」到唔少巨額捐款，加上自己獲病人捐款，籌款順利過關。
何解醫病同籌款有關呢？原來梁校長未加入公大前係骨科聖手，曾任港大醫學院骨科學系系主任兼講座教授，最拿手醫治脊椎側彎、全身癱瘓等骨科問題。行醫數十年，經佢手醫好嘅病人多如天上繁星，病人知道佢棄醫從教，都大力「科水」，最富貴嘅病人捐成二千萬元，善長係邊位？梁校長就唔講嘞。
陳繁昌返「7.11」
其他院校咁勁，新丁難免有壓力，返咗兩個禮拜工嘅科大新校長陳繁昌話，上任後最大挑戰係不停識人，四出拜訪教職員、學生及校友，呢兩星期都係返「7.11」更期，即係返朝七收晚十一，都咪話唔辛苦。
卓妮