功夫茶之所以有呢個無厘頭推測，係建基於一個無厘頭事實，房屋署為公屋更換升降機，原來係唔會親身走去現場視察環境㗎，更加唔會量度尺寸，求求其其是是但但就動用三千萬公帑去買！

大家可能會話，唔會咁荒謬啩，大拿拿三千萬，竟然唔度尺寸就去買，唔通真係有斷估、冇痛苦？本來功夫茶都唔信，不過睇完呢個古仔之後，兩粒眼珠幾乎跌落地。

係咁嘅，九龍灣啟業邨耗資三千萬進行升降機更換工程，總共要換六幢大廈二十七部。第一期工程舊年九月展開，原定今年六月完工，涉及三幢大廈五部。點不知，遲遲都未見完工喎，居民等到唔耐煩，於是今年七月兩次去信陳署長要求解釋延期原因。房屋署拖到八月底先至回覆，而且鬼拍後尾枕自揭瘡疤，原來槽結構同圖則不符，買番嚟嘅升降機唔啱尺寸，所有工程要推倒重來，預計要今年十一月先至可以完工。

呢嗱嗱嗱，大家睇睇，入錯貨嘅原因既然係槽結構同圖則不符，到底乜嘢意思呀？即係話，房屋署事前根本冇做足準備工夫，冇去現場度尺，純粹靠Ｎ年前嘅爛鬼圖則「紙上談兵」，買咗五部先至發覺，弊傢伙，圖則錯鬼咗！

話時話，買之前唔度尺寸固之然係荒謬到極，圖則點解又會同事實不符嘅呢？啟業邨三十年前係點樣興建嘅呢？唔通成條邨嘅建築辦法又係唔理規矩圓方，一味靠估？諗諗下，功夫茶有少少驚，你知啦，政府起樓好多醜聞㗎，一時又話鹹水樓，一時又話短樁，陳鎮源最好搵人睇睇成條啟業邨嘅結構有冇問題。

講番換，家陣就話買錯五部啫，查實會唔會二十七部統統買錯㗎？講緊嘅係三千萬公帑，房屋署可唔可以認真少少？買唔同買菜，買錯一來浪費公帑，二來涉及人命安全。喂，大家都記憶猶新啦，大埔富善邨有升降機砰嘭一嘢直墮槽底，嚇到全港幾百萬粒眼珠幾乎又係跌落地。萬一，假如，大吉利是講句，啟業邨因為買錯咗有問題嘅升降機而發生墮奪命慘劇，睇怕陳鎮源跌落地嘅唔係眼珠，而係人頭！

唉，就算冇墮，啟業邨居民家陣已經夠慘情。換唔係話換就換，梗有一個封期，工程延誤等於居民冇搭。目前六幢大廈關閉咗十二部升降機，出出入入上上落落非常之咁唔方便，周不時等等到結晒蜘蛛網。

所以話啫，連買咁大件事都可以一味靠估，陳署長買鞋有乜可能要親身試着？咦，咪住咪住，功夫茶諗到一個好滑稽嘅場面，房署相關職員他日百年歸老，入土為安嘅時候先至發覺，弊傢伙，入錯貨，棺材尺寸錯鬼咗！