後台做「阿四」

身為胡關李羅律師行高級合夥人嘅馬律師同太太志趣相投，但一個愛鬼佬歌劇，一個愛中國粵曲，一中一西，品味迥異。馬律師好識做，從來唔會同太太比試唱腔，免得嗌交。太太前晚登台，佢一早到後台做「阿四」，為太太整理出騷衣服，又坐埋一邊欣賞太太化妝，夠晒體貼。

馬律師話，自己已「封咪」，自從去年出席師傅林祥園的告別演唱會後，已好少唱歌，反而太太歌癮仍在，尋日同姐姐廖寶玲、妹妹廖寶珊組成「三朵金花」登台，馬太唱小明星嘅《星韻心影》，本身係插花老師嘅佢，專登用兩晚時間自製八個絲花球點綴舞台，認真貪靚。

馬太喺後台拉埋姐妹合照，原來廖家三姐妹向來行動一致，十年前一齊走去學唱粵曲，馬太自己亦出過十幾次騷，踏台板簡直係駕輕就熟，不過四年前亦遇上一次「蝦碌」經驗，話說當日馬太腰骨痛發作，出騷前曾搵醫生打針及食藥，想話放鬆吓啲肌肉，點知連腦袋都放鬆埋，出台一刻魂遊太虛，忘記歌詞，幸好樂師識得執生。

卓妮