一向畀人並不激烈印象嘅香港律師會，尋日好罕有咁高調舉行記者會，狠批負責法援政策嘅民政局，多年來一直漠視佢哋要求調高刑事法律律師費嘅要求，決定進行為期一個月嘅拒接法援個案杯葛行動。相信唔少市民聽到有關新聞之後，第一個反應並非民政局同律師會誰是誰非，而係：「乜法援政策又關民政局嘅事咩？」

律師會轟漠視加費要求

其實法援政策過往一直由政務司司長同行政署負責，兩年前先畀煲呔曾亂點鴛鴦，唔知點解判咗畀民政局搞埋，當時已經引起法律界強烈反對，質疑民政局本身已經要負責好多瓣政策，依家再孭多樣，好易會掛一漏萬，顧此失彼。尋日亦有出席記者會聲援律師會嘅社區組織協會主席何喜華，就形容民政局已經變成政府嘅雜物房，凡係冇人想掂嘅厭惡性政策都質晒畀佢哋。

至於最近炒得熱烘烘嘅「河蟹事件」，德成局長就更加無辜。據聞大澳鄉事委員會同當區區議員投訴該名社工嘅多封信件，局長只睇過一千零一封，之後就交晒畀啲手下處理，點知因為自己同女青年會會面時，唔小心講多咗一句說話：「好似唔係幾和諧喎」，就咁畀人擺咗上枱。

最慘係女青年會上周召開記者會澄清事件時，一方面證實局長並冇向佢哋施壓，但另一方面又話局長嘅說話都有對佢哋造成些微影響，令事件愈描愈黑。立法會聽日會就事件召開個案會議，有議員更聲言要引用特權法徹查事件，德成局長想喺今次風波中全身而退，絕非易事。

德成局長除咗因為瓣數多同當黑，自己成日抵唔住頸同啲議員互插互片，都係佢頻頻惹禍嘅原因之一。

德成局長想推動和諧，首先就要自己同各方面都和諧啲，否則只會變成倒瀉籮蟹，鉗到自己周身傷晒。