唉，唔好咁天真啦，好似平機會呢個爛透心嘅政治花瓶，冇透明度就梗㗎啦。你知啦，依家平機會黑箱作業都搞成咁，醜聞一單接一單，如果再多些少透明度仲得了嘅，到時日日爆一單醜聞，市民隨時激到爆血管都似呀。

話時話，好多人質疑呢次遴選新主席係做戲咁做，唔係無的放矢㗎，大家都知，當局嘅所謂遴選往往得啖笑，十居其九都係用人唯親㗎啦。平機會主席話就話由一個遴選委員會建議最適合人選，實際上最終都係由行政長官委任，講到尾咪又係隻手遮天。

類似嘅欽點個案多過乜，遠嘅唔講，睇番當局委任金管局新總裁陳德霖嘅過程，已經夠晒騎呢。候選者竟然唔知自己列入咗遴選名單，由頭到尾都係得曾蔭權死黨陳德霖單拖被遴選。你話唔係內定，講都冇人信啦。

所以呢，今次話要招聘平機會主席，大家都係唔好咁認真，當睇戲就得嘞。事關政府自本年七月提出公開招聘主席後，神神秘秘咁唔知搞邊科，拖到九月至推出招聘廣告，好難唔令人懷疑係「陳德霖事件」嘅翻版喎。今次好明顯政府又想重施故技，搵到內定人選之後，至扮晒嘢做吓樣搞假遴選。

梗係啦，做平機會主席月入廿萬，但又無所事事，只需要行行企企，食飯幾味，呢份咁嘅絕世好工，當然要益自己人啦。現任主席鄧爾邦就係人辦啦，佢有聯合國消除種族歧視委員會會議咁重要嘅會議唔出席，之但係無聊公幹就仆到去，連九唔搭八嘅非洲人權會議都唔放過，名係公幹，實則係公費遊埠就真。

不過，做平機會主席都唔係易㗎，你自問有冇鄧爾邦咁大花筒吖，搭飛機要升級坐商務客位，住酒店要住「大使套房」。你自問有冇鄧爾邦面皮咁厚吖，就算畀審計署踢爆醜聞，一於詐傻扮懵；即使立法會政府帳目委員會表示「極度遺憾」，一樣當聽唔到，好官我自為之，繼續賴死唔走。千祈咪以為佢轉死性，趁呢段時間將功補過呀，原來佢只不過為咗撐到明年一月合約屆滿，袋埋嗰百萬元約滿酬金咋。

唉，講到底，政治花瓶始終係政治花瓶，點透明都冇用，一日唔打爛呢個花瓶，走咗一個鄧爾邦，仲有千千萬萬個大花筒等住嚟呀！