講開九九九，尋日撞正良辰吉日「長長久久三條九」。如果咁啱得咁蹺有人喺○九年九月九日打九九九求救，結果男人老狗九壯士徒步抬去九龍醫院，你都咪話唔搞笑。

之所以提起「人肉白車」，功夫茶其實係想話畀大家知，消防處轄下救護資源十分緊絀，一直以七個蓋冚十個煲。救護車本來就唔夠，再加上周不時會因為老爺機件唔生性而跪低死火，十萬火急救援行動隨時延誤。既然如此，係咪應該增加資源呀？弊就弊在，消防處唔知係咪食錯藥，唔去增加不特止，反而無厘頭削減資源！

事緣係咁嘅，上水古洞開設救護站，消防處唔去要求政府額外招聘人手，竟然神神化化走去荃葵青區抽調十八個救護人員，其中十五個調去古洞，另外三個唔知調去邊，斷估唔會係黑洞啩。喂，都話到明家陣係七個蓋冚十個煲咯，消防處咁戇居嘅做法，咪即係七個蓋冚十一個煲？上水古洞開多個煲唔係問題，服務當地居民仲係好事添，不過你要買多個蓋吖嘛，死蠢！

消防處另外一個做法又係戇居到痹。青衣救護站一直紀錄優良，依足服務承諾十二分鐘之內到達現場嘅比率係百分之九十六點幾，消防處就話嘞，你哋達標比率咁高，即係資源太多啦，亦即係有削減嘅空間。於是乎，消防處一聲令下，青衣救護站嘅白車數目由日間六架減至四架，夜間三架減至兩架，然後將白車調畀其他紀錄差嘅救護站。唔知大家點睇，功夫茶就覺得好滑稽，唔通學生哥讀書考試九十六分要受罰，反而唔合格嗰個要攞獎？

面對惡劣環境，難怪消防處救護員會副主席屈奇安承認，同袍早已士氣低落。救護員士氣低落固然值得同情，不過功夫茶最關心嘅係，救護資源不足隨時大禍臨頭，萬一有需要打九九九，你點擔保一定有人救？一個唔好彩做咗冇蓋冚嘅煲，咁就真係大大煲！

既然講開奇聞，不如講多兩單。第一單，曾經有惡霸司機唔肯讓路畀白車救人，跟住仲要截停人哋爆粗罵街。第二單，根據道路交通（交通管制）規例第四十六條，司機唔讓路畀白車固然係犯法，之不過咁，原來法例又規定「在道路上管束動物（但並非家畜）的人提出要求或發出訊號時」，司機必須讓路。讓路畀唔係家畜嘅動物？功夫茶真係一頭霧水，唔通有人拖狗出街，或者有人買咗條魚，發出訊號叫你停車，唔停就係犯法咯喎？呢條古怪法例比削減救護資源更加騎呢！