自由黨副主席方剛、飲食界立法會議員張宇人同前副主席周梁淑怡尋日趁○九年九月九日，取其「長長久久」好意頭，喺時代廣場送月餅兼派出第五波消費券，又同市民玩猜謎，現場氣氛熱烈。可惜嘅係，消費券嘅市場反應就無咁熱烈，方剛尋日中期總結話，消費券嘅使用率一般只得一成，佢間時裝公司有兩成「回收率」，已經叫做相當唔錯。
由自由黨牽頭嘅「齊抗金融海嘯大聯盟」四月發起派發消費券，諗住一直派到十二月嘅第七波，希望以此拉動內部消費自救，啟動之初聲勢浩大，但經過半年實驗，證明業界自己搞真係好困難！
方剛解釋，自己開嘅時裝公司，會將消費券派畀ＶＩＰ顧客，呢類客人消費力強，所以攞到消費券後，好多時候都可以用得番，粗略估計，有兩成「回收率」，大聯盟其他公司，普遍只係收回一成左右嘅消費券。初步估計，計埋尋日派發嘅第五波消費券，總共派出超過十萬本，一成回收率，即係有一萬人次以荷包支持消費券行動。換個角度睇，喺咁嘅經濟環境，方剛都應該覺得安慰囉。