最近醫學界最轟動嘅莫過於前港大醫學院院長林兆鑫因公職人員行為失當判監廿五個月，連一向風平浪靜嘅中大都認為事件值得警惕。中大醫學院早有先見之明，院長霍泰輝話佢唔會理會班醫生教授去邊度睇私家症，即使由新界過對面海睇症都冇問題，因為一早已經有制度限住醫生用幾多時間睇私家症，最緊要唔好超時。
公立醫院最近醫療事故多籮籮，搞到醫管局班高層頭都痕埋。霍泰輝就獻計，呢啲事故無得百分百避免，因為有時真係做到「鬼眼」，明明有核對都出錯，最佳辦法就係搵多一個人再對。好似威爾斯醫院嘅新生嬰兒病房，幾年前已經要求護士覆核醫生藥物處方，每個ＢＢ食幾多劑量嘅藥都要護士由頭計一次，初頭護士都唔肯，但依家已經做慣做熟，對少一步都唔得。
兒科出身嘅霍泰輝，十年前已經爭取搵專人看住ＢＢ房個門口，父母出入探ＢＢ都要對身份證，確保毫無還擊之力嘅ＢＢ唔會畀人抱走，甚至畀人陷害。佢話每一單醫療事故發生之後都要花好多人力物力去調查，分分鐘貴個請一個助理看守住ＢＢ房，唔知其他醫院會否偷吓橋呢？