本報早前披露，康文署○一年籌備孫中山紀念館時，從美國購入二千七百件孫中山文物，康樂及文化事務署助理署長吳志華負責到美國接收，但點算時發現無咗廿一項文物，後來吳被指有疏忽，已被處分。捲入醜聞嘅吳志華尋日出席古物諮詢委員會會議，今次係爆出呢單醜聞以來，佢首次出席公開場合，我哋把握機會，一早守候會議場地，等佢出現，諗住訪問吓佢。
點知一見到佢、叫聲佢「吳生」，佢反應好大，見到我哋舉機影相，更加用手遮擋鏡頭，變咗「蒙面超人」。「醜婦終須見家翁」，堂堂一個助理署長對住鏡頭竟然有咁嘅反應，的確令人驚訝，究竟有咩咁唔見得人呢？咁真係要問佢自己至知喇。
吳志華以前亦經常面對傳媒，被記者影過唔少相，我哋搵番佢張靚相出嚟，畀讀者認清佢嘅廬山真面目。至於我哋追問佢有關遺失孫中山文物嘅事，佢就一如所料，充耳不聞，急步走入會議室。康文署新任署長馮程淑儀之前做過新聞處處長，睇嚟佢除咗要整頓爛透嘅康文署之外，都要好好教吓班手足如何應對傳媒。