退休在即嘅金管局總裁任志剛尋日六十二歲牛一，今年係佢最後一次喺金管局過生日，任總嘅生日願望好簡單，佢話「最緊要開心」！據聞金管局班同事月尾會喺馬會幫佢搞個大型歡送會，可能順手慶祝埋生日，所以尋日任總就低調過牛一。不過，佢都為自己安排咗個另類慶祝活動，就係搵司機影合照留念。
任總做埋今個月就結束十六年金管局生涯，臨別秋波，任總除咗唔捨得金管局一班同事外，原來仲有一個人令佢懷念，呢個就係跟咗佢十幾年嘅專屬司機Jimmy喇！Jimmy尋日如常將架車泊喺金管局門口等任總收工，點知任總專登請個同事揸機，幫佢同Jimmy喺金管局前面留影，任總仲千叮萬囑一定要影埋同樣跟咗佢好多年、政府官員專用嘅「AM78」車牌。任總上至金管局高層、下至司機一樣咁重視，難怪佢多年嚟深得局內上下員工愛戴，坐足十六年。
自從任總宣布退休後，外界不斷揣測佢嘅未來動向，有傳佢將會去中國人民銀行做顧問，不過任總多番強調退休之後，第一件事就係放番個長假，同太太去旅行。至於將來有乜打算，佢就話等放完假先諗再出發嘅問題喎！