前經濟發展及勞工局局長葉澍堃（Stephen）退休後變身食評家，教人煮餸食好嘢。為咗消脂，Stephen愛上每周打乒乓波瘦身。日前卓妮約咗朋友喺跑馬地馬會會所見面，咁啱撞見Stephen同幾位名人喺度切磋球技，包括富豪飯堂鏞記老闆甘健成、中華廠商聯合會會長尹德勝及廠商會行政總裁梁世華，卓妮請纓做裁判，見證呢場名人乒球友誼賽。
夥拍鏞記老闆
比賽分雙打及單打賽，Stephen同甘老闆湊成一隊，尹會長就同梁世華組成另一隊。呢兩組人相識多年，但埋牙對決仲係首次。Stephen自爆三十年前已經同梁世華「交過手」，當年兩人同係政務官，被派往英國牛津大學受訓一年，閒來無事打波自娛，但Stephen當年技不如人，輸足一年，難怪佢話今次要復仇。不過，梁世華換衫落場前突然發現自己唔記得帶波鞋，拿拿臨走入會所商店買鞋，認真老貓燒鬚！
比賽以雙打賽開始，兩組人勢均力敵，老手尹德勝頻頻起板抽擊攞分，一睇就知道係實力派；拜師北京教練嘅Stephen使出功架，同甘健成組成「夢幻組合」，亦以快速殺球還以顏色，甘健成更頻頻開波直接得分。經五輪決戰後，Stephen與甘健成嗰一隊以直落三比○勝出。賽後Stephen同梁世華一邊握手一邊示威話：「估唔到三十年後終於威番次囉！」
尹德勝請食飯
接住輪到單打賽，尹德勝對住甘健成，三局決勝負，失落雙打賽嘅尹會長以二比○勝出。梁世華就同Stephen對決，梁世華主動提出唔計分，免傷和氣，喺冇計分壓力下，早前未能喺雙打賽發揮嘅佢表現神勇，一度殺到Stephen措手不及，兩人最後喺歡樂聲中收場。
時近夜晚八點，尹德勝提出做東請食晚飯。Stephen喺席間發揮食家本色，話日前班老友去青山公路容龍別墅嘅海鮮酒家大擦海鮮宴，為求新鮮，走去屯門老鼠洲用六千元購下多款海鮮，包括蘇格蘭蟶子、龍躉、巨型龍蝦等。九月中，Stephen又會夥拍電視台去法國著名釀酒區拍攝美食特輯，穿梭酒莊品嘗極品紅酒，有得飲又有得食！