二○○八年北京奧運，香港政商界四圍撲開幕飛，就連闊太們都唔執輸，出盡辦法仲差啲臨門一腳睇唔成，有人就連閉幕禮都唔放過，一於搏到盡。今年「十‧一」日期逼近，香江再掀撲飛熱，據悉，三十六名港區人大上周終於收到中聯辦嘅訪京預告信，溫馨提示九月三十日下午兩點前抵達北京，有啲仲收到唔止一個內地部門邀請。不過，有啲政商界人士仍然望穿秋水都未收到消息，個心七上八落，事關政界重量級人馬都上晒京，如果「十‧一」前後嗰兩日被人見到現身香港，都咪話唔尷尬。
身份象徵 四處敲門
隨着「十‧一」臨近，不同系統嘅內地單位，好似人大、政協、僑聯、工商聯、婦聯、全國總工會、衞生部等不同機構，日內陸續向香港各界人士發信，邀請佢哋參加「十‧一」活動，不過，當中有等級分野，接待規格亦有分別。按傳統，由特區政府牽頭嘅香港各界觀禮團（今年名額約二百五十人）同三十六名港區人大，肯定獲安排喺十月一日早上出席閱兵儀式，港區政協據聞今年亦獲相同待遇。而僑聯、婦聯同全國總工會等嘅賓客，一般無緣睇閱兵，亦無份出席九月三十日晚嘅國宴，好似去年咁，僑聯就喺廿九日晚宴請賓客。
難怪港區人大、政協以外嘅政商界人士，都以入到香港各界觀禮團為目標，據聞唔少人最近四處敲門，想躋身做團員，以展示身份象徵，不過，名額有限，僧多粥少，好多撲飛變撲空，簡直係爭崩頭，尤其港區人大上周已收到中聯辦代全國人大辦公廳轉達嘅「請代表們預留時間信」，叮囑大家安排好手頭工作，九月三十日下午兩點前抵京，十月二日上午可離京，呢封信等同正式邀請信，其他界別才俊如果依家都未收到半點獲邀風聲，心情同處境一樣，都係半天吊！試問點會唔囉囉攣？
未有邀請信囉囉攣
有人驚攞唔到隨團訪京嘅登機證，但有啲人啱啱相反，邀請信多到收唔切，事關有啲人身份橫跨多個界別，而且都有頭有面，同時得到幾個不同內地單位邀請，問題係佢哋嘅住宿同活動安排唔同，必須作出抉擇。據聞內地單位喺最後階段，會內部協調，向呢班人士作出「最佳建議」，梗係以有機會參加閱兵為優先之選啦！