高永文感謝救命恩人

高醫生介紹肥胡出場時，趁機感謝恩人，話兩年前喺雲南參加長征時腦下垂腫瘤突然病發，多得肥胡瞓身幫佢撲機票返港就醫，先至檢回一命，尋日借午餐會以表謝意。講番個講座，肥胡由政治講到豬流感，佢話香港人最忌有大香港心態，由於周邊城市發展得好快，港人要北望神州之餘，仲要時刻自我增值。至於豬流感，肥胡叫大家唔使咁驚，因為呢個已經成為風土病，所以身邊有人感染一啲都唔出奇，佢仲笑言：「可能我都有呢！」

高永文（後排中）搞午餐會，一班醫管局舊同事畀面撐場，包括九龍東醫院聯網總監陸志聰醫生（後排右一）及港島西醫院聯網總監賴福明醫生（前排右二）。 （葉華英攝）

馬清鏗（左）見到胡定旭（右），興奮地上前握手。

莊學山洞梓山得奇石

肥胡仲主動拆彈，提起公共醫療醫生協會會長何栢良喺電台批評醫管局高層唔了解前線狀況、落親去就一大棚人嘅言論。肥胡話工會代表發言佢一定會尊重，仲舉例有次行經將軍澳醫院，遇見一名手挽Chanel手袋嘅女士因夾親手指入急症室求診，點知等咗三粒鐘都未輪到佢，大發雷霆話要轉去私家醫院，肥胡聽見即時「順應民意」，提出護送對方一程去私家醫院，不過被對方婉拒。肥胡咁講法，變相告訴大家，佢經常微服出巡，並唔使成棚人跟住晒，又叫大家切勿濫用急症室。

潮州商會永遠名譽會長莊學山尋日亦有撐場，講起表哥長實主席李嘉誠斥巨資興建嘅大埔洞梓山觀音像進展成點，莊主席報喜話，搵咗興建大嶼山天壇大佛嘅中國航天科技部幫手鑄造，工人正喺北京及南京趕緊工，預計兩年多完工。莊主席又喺洞梓山發現一塊奇石，正打算搵國學大師兼心經簡林作者饒宗頤刻上心經，放喺觀音像旁邊供遊人觀賞。

同場仲有前東華主席馬清鏗，佢透露趁暑假返回美國母校賓夕凡尼亞大學幫手「撲水」籌建新校舍，三十幾年未返過母校，今次重遊舊地勾起唔少回憶，佢仲好懷念讀大學時無憂無慮嘅日子。

肥胡講完Talk即刻趕下場，原來「智經」班同事提早一日賀肥胡五十五歲生日，肥胡一邊切巨型蛋糕一邊許願，莫非祈求少啲醫療事故發生？肥胡無正面回應，只係講笑咁話瘦番十磅就心滿意足喎。

卓妮