時移世易，香港今非昔比，優勢漸失，港人變咗港燦，相反內地經濟急速起飛，好多阿燦都變咗有錢佬。不過咁，依家仲有唔少人偷渡嚟香港，你話奇唔奇吖？更奇嘅係，警察莫講話唔能夠將佢哋「即捕即解」，就算佢哋名正言順咁打工，警察都冇符。

事緣近期有人蛇集團猛咁散播「港府將特赦政治庇護難民」謠言，吸引大批非華裔人士經東南亞國家以及內地屈蛇偷渡來港，講聲申請政治庇護就有張「行街紙」，可以難民身份打工，不知幾過癮。

其實講到底，咪就係多得特區政府唔衰攞嚟衰！話說高等法院今年三月初裁定二十九名持有「行街紙」嘅南亞裔難民，可以喺香港工作。既然港府咁大方，來者不拒，唔怪得非華裔黑工排山倒海咁湧嚟香港啦！

根據警方提供嘅資料，近來非法入境者激增，今年七月警方截獲非華裔非法入境者嘅數字係今年一月嘅五倍，每月因違反居留條件而被捕嘅竟然高達三百人呀，問你怕未？

冇錯，由於本港係禁止酷刑公約嘅簽署地區，任何人如有充分理由證明返國後會受到酷刑對待，就可提出「酷刑聲請」，申請政治庇護。依家唔係話政治庇護有問題，如果係真真正正受到迫害嘅難民，港府為佢哋提供庇護梗係冇人反對喇。問題係，你睇吓西方國家吖，佢哋批出政治庇護要經過嚴格審批程序，邊有話任由偷渡客指吓個鼻就得咁兒戲㗎。

其實係人都知呢班非華裔人士當中，絕大多數根本係假政治難民，佢哋來港申請政治庇護，目的係為咗打黑工，搵真銀！

呢班假政治難民嚟搶港人飯碗都算嘞，最弊係金融海嘯打擊之下，唔少本地打工仔都冇工開，如果呢班假政治難民搵唔到嘢做鋌而走險，作奸犯科，咁就手尾長咯。

唔係功夫茶危言聳聽㗎，呢嗱，長期聚集大批「難民」嘅尖沙咀，社區問題愈來愈嚴重。街坊話，該區環境愈來愈雜，有人隨街大小二便唔在講，最弊係唔少非裔、南亞裔等流鶯企街，令到一個世界知名嘅旅遊區變成紅燈區，連本來諗住嚟觀光購物嘅旅客都嚇走埋，你話幾大劑呢！

唔係講笑，有線報話，已有成十萬名南亞及非裔人士進駐內地，隨時準備偷渡來港掘金。話時話，港府大開中門，都唔知係咪故意咁做。你知啦，煲呔曾成日叫香港每對夫婦生三個，將香港打造成一個有千萬人口嘅「紐倫港」大都會，可惜冇人聽佢支笛。依家咪好咯，有咁多非華裔生力軍湧港，香港何止一千萬人口，港府再係放任不管，唔修例堵塞漏洞，二千萬人口話都冇咁易吖！