金融海嘯後，又嚟一個豬流感，零售業可謂屋漏兼逢連夜雨，好在業界識得自救，立法會批發及零售界議員方剛除咗全力推銷消費券，最近亦頻頻出席業界活動撐場。有五十七年歷史嘅「九龍錶行」尋日喺上水開第五間分店，方剛亦有現身，同香港鐘錶業總會永遠名譽會長孫秉樞齊齊做主禮嘉賓。身為鐘錶業總會顧問嘅九龍錶行老闆黃錦成話，佢同方剛係好熟嘅朋友，好滿意方剛不斷為業界服務，唔止下次新舖開張會請方剛主禮，仲話下屆立法會選舉都繼續投佢一票添。
講番今次開新舖，原來同個人遊有好大關係。黃錦成話，錶行有六、七成生意都係個人遊遊客，所以開舖都向北移，選擇個人遊來港嘅第一關上水，仲話會用星級服務守好呢一關，為零售業響頭炮。黃錦成有計劃再擴充，下一站應該係元朗，目標都係內地遊客。
咁內地遊客鍾意邊類型嘅錶呢？黃錦成話主要分兩類，一類就係根深柢固，指定買某啲牌子，尤其係梅花、天梭、奧米茄呢啲就特別受歡迎；另一類客就追潮流，會睇雜誌呢排流行邊款手錶但內地又無得賣，就會嚟香港買。不過，咪以為做鐘錶就對錶特別挑剔，好似黃錦成咁，佢戴緊嘅錶係朋友幾年前送，唔係特別貴，但好有紀念價值；孫秉樞買錶都係睇款式，偏愛鋼錶，但平日替換嘅錶絕對無十隻。方剛就對錶無咩要求，依家隻錶戴咗逾五年，估唔到一眾男士對手錶都幾長情。