香港廠商聯合會邁進七十五周年，尋晚喺港島香格里拉舉行酒會，政商界逾千位名人到賀，場面人山人海，會長尹德勝滿場飛招呼賓客，眾人話題離不開「誰是下屆會長」。兩大候選人黃友嘉及呂明華把握機會「拉票」，雙方鬥到難分難解。廠商會元老級人馬陳永棋就公開力撐黃友嘉「係合適會長人選」，棋哥早前喺總商會理事會選舉中發功，成功扶植後輩上位，今次「挺」得咁盡，會長寶座之位，呼之欲出喇！
酒會上，多位廠商會副會長包括林大輝、施榮懷、羅富昌及行政總裁梁世華均有現身招呼客人。棋哥見到黃友嘉就讚佢年輕有為、有魄力，而且年齡啱啱好。咁講法，莫非暗示年屆七十嘅呂明華年紀大咗啲？
問黃友嘉係咪勝券在握，佢話唔想講選舉嘢，但提起家人就笑逐顏開，話暑假期間送細女入讀美國華盛頓大學，大女亦於早前考入美國加州大學，兩位千金相繼出國讀書，好唔捨得，所以會全身投入做公職，等自己唔使心掛掛。
信置主席黃志祥尋日亦有到賀，早前佢應尹會長邀請食飯密斟，到底兩人傾啲乜？尹德勝話，黃主席公司旗下有咁多商場，第日借地方搞活動都易好多。言下之意，即係廠商會又多咗條「大水喉」射住，將來仲大有作為！