工聯立法會舊組合「煎釀三寶」形象突出，以前經常成為傳媒採訪焦點，除咗因為佢哋成日同煲呔曾頂到行，成為親中陣營奇葩之外，亦由於三人各有鮮明形象，好似嫻姐火爆、鄺大狀有法律專業背景、王國興就由區佬打拚出身，稜角突出，喺公眾心目中零舍容易攞分。有嫻姐三人珠玉在前，今屆工聯四子要殺出血路，難度更高，審視過去一年表現，論聲勢、論光芒，更加有少少被「煎釀三寶」比下去嘅感覺。

身為工聯會立法會黨團召集人嘅KK承認，爭取曝光率同提高知名度係未來一年工作重點，最近四人碰頭腦震盪，終於敲定各人嘅分工角色，希望借樹立鮮明形象，提高知名度。按分工部署，工聯以後由葉偉明專門處理勞資糾紛，好似最近領匯變相炒外判工，就交晒畀葉偉明做獨腳戲；潘佩璆睇實公務員呢瓣，做公務員問題專家；王國興專注基層民生、基建同整體勞工市場情況，延續其「親中長毛」形象；而身兼港區人大嘅KK就負責政治層面議題，政改、政黨合作同特區管治呢堆棘手問題，就集中由佢應對傳媒。即係話，工聯四子以後各有自己嘅品牌形象，能否成功發圍，做到深入民心，就要靠各人嘅修為同努力嘞。

五散人「惡啲」對政府

除咗工聯四子打算重塑形象重新上路，立法會另一新組合「五散人」，即係廠商會代表林大輝、「I.T.豪」譚偉豪、會計界陳茂波、保險界陳健波同「怪醫」梁家騮，檢討一年磨合經驗之後，亦有新部署。I.T.豪話，五散人以後會「惡啲」，揀啲議題發炮批評政府，好似特區嘅人才政策咁，就認真抵鬧，外國輸入移民，以吸納專業人才、管理人員同企業投資者為主，靠呢班人帶動經濟，創造就業，但睇番香港投資移民政策，大部分都係嚟香港買樓，托起個市，大發展商得益，中小企同市民就逼住捱貴租，情況相當荒謬！五散人發炮，政府都無話可說啦。