卓妮尋日中午經過中環香港會，撞到阿松同Henry等一眾名人去完「鳳凰午宴」出嚟，以前做財爺唱歌叻嘅梁錦松，對政府一味唱好有啲保留，仲叫小市民要小心︰「政府話穩定都有啲穩定，不過外圍變數大，市民投資要審慎啲。」問番佢自己依家忙咩，佢諗都唔使諗就話︰「忙搵食！」唔知佢係指生意好得滯所以「忙」，定係無生意忙住搵生意嗰個「忙」呢？

至於無得同中信泰富「同偕白首」嘅Henry，雖然件事過咗幾個月，但問到佢無辦法做到退休、覺唔覺得遺憾，佢諗咗一諗先話︰「依家最緊要係公司能夠穩步發展，一直好落去！」可見佢對公司仲好有感情。講番經濟，Henry分析話，香港經濟係咪復甦仲存在好多變數，事實上未完全穩定下來，事關美國目前仍然係全球最大產品輸入國，惟經濟仍然疲弱，信貸及樓市存在嘅風險難以估計。咁市民現階段係咪適宜投資呢？佢話可以投資，亦都可以買股票，但風高浪急，市民就要小心啲嘞！

陳祖澤望增場次利收入

同場嘅仲有馬會主席陳祖澤（John），今年馬季會加多五個賽馬日，阿John話希望令馬會「盤數」靚仔啲，但一切要視乎經濟環境，似乎對經濟前景未敢樂觀。講到失業數字依然高企，佢話呢個無辦法，要等佢慢慢回番，加埋依家班大學生畢業，相信都無咁快回到，但馬會就會繼續請人。

卓妮