醫院管理局要求公立醫院醫生跟大隊減薪，醫院聯網服務總監張偉麟更被指恐嚇醫生，話如果醫生下月底前唔簽同意書，就即時炒魷，搞到醫生組別協商委員會全體十六名醫生代表「總辭」，以示不滿。不過事件急轉直下，行政總裁蘇利民親自打電話畀公共醫療醫生協會會長何栢良道歉，啲醫生條氣當堂順晒。
蘇利民尋日親自打電話畀何栢良，低聲下氣道歉之餘，仲即刻「收回成命」，轉晒口風話醫生唔簽同意書都唔使炒，簽名限期亦可延遲咁話。何醫生話尋日朝早剪剪下頭髮就收到蘇利民呢個「和頭call」，承認管理層嘅處理手法同溝通技巧都有問題，仲開聲挽留劈咗炮嘅醫生代表，唔啱傾到啱。既然今次管理層肯認衰，何醫生同其他代表都唔想傷和氣，好大機會繼續留任。
至於疑似恐嚇風波「元兇」嘅張偉麟，據講管理層亦唔再畀佢插手，換過第二個去應付班醫生。何栢良就話其實尋日仲收到另一個「補飛」電話，至於對方係邊個，大家都應該估到，佢都唔多講啦！