點解竹林會令大輝咁驚呢？原來嗰度係停屍嘅地方，凡係村內有鄉親父老過身，都會喺嗰度搞公祭。大輝話印象中幾乎每個星期都會有長輩過身，朝早陽光充沛時行過都仲好啲，放學已經係黃昏，竹影幢幢再加上做法事嘅「啲打」聲，都咪話唔驚，所以大輝每次經過都要雞咁腳咁走。有時人有三急，大輝「方便」前會講「唔該借借」，「方便」後就講「唔好意思打攪晒」，務求各位長輩唔好以為佢無禮貌而「指教」佢。

出身草根階層嘅大輝，就算依家「升呢」成功都冇忘本。上星期佢就去咗民協嘅社企度參觀，仲呼籲班工商界朋友，將啲賣唔出嘅貨品平啲賣畀社企，實行一家便宜兩家着，齊齊幫手解決貧富懸殊問題咁話。