尋日四太約咗一班朋友出嚟食tea，食到一半仲拎咗件Ｔ恤出嚟左度右度。睇平時四太嘅衣着，點都唔似會對Ｔ恤有興趣吖，細問之下先知原來件Ｔ恤係選舉宣傳嘅一部分。下個月二十日就係澳門立法會選舉嘅大日子，係現任議員嘅四太尋求連任，之前掛住照顧賭王可能耽擱咗啲時間，依家就要急起直追。

事關星期六開始一連兩個星期，就係澳門立法會選舉嘅競選活動期，雖然四太喺上屆大熱勝出，但選舉在即都唔敢怠慢，所以同班朋友度好橋點整宣傳Ｔ恤之後，四太就急急腳趕返澳門，話要開始準備競選活動期嘅宣傳活動。四太仲打算去各區洗樓，務求盡量善用競選活動期嘅每分每秒，搵到多啲市民支持佢咁話。咁唔知四太有無信心可以連任成功呢？四太就笑笑口話做人一定要有信心喎。