肥亨尋日上電台節目清楚講明，自己唔係海嘯逃兵，佢笑言：「我邊有咁叻可以預視到金融海嘯，一切都係神嘅旨意。」佢憶述，當時由發現腦瘤到離開官場，心情其實好複雜，作為官員，佢對香港有一份承擔，但如果任由得個瘤唔處理，一直喺壓力下工作，又冇時間做運動，最終可能會腦中風，佢衡量過之後覺得命仔要緊，所以毅然辭職。

肥亨總結六年為官經驗得出兩個字——「用心」，佢話：「市民嘅眼睛係雪亮，你用心去服務一定會得到認同……做嘢嘅過程唔可以敷衍，唔係做show！」

預期經濟復甦動「Ｌ」

肥亨不在其位，反而可以更客觀分析今次金融危機嘅前因後果，佢尋日大讚中國同美國政府處理得好，國與國之間加強合作令經濟復甦步伐加快。佢話，今次銀行體系傷得好重，所以經濟復甦速度唔會係Ｖ形反彈，而係Ｌ形，而且Ｌ字嗰一橫仲隱藏好多個「Ｗ」，即經濟會不時上上落落，佢估計大概要兩年時間，香港嘅經濟才真正有起色。

早前肥亨打電話上電台為正生書院嘅學生平反時，一度感觸落淚，肥亨自言嗰次係人生中第四次落淚。佢話，第一次係廿四歲嗰年被調職去紐約，當時個老闆好難服侍，日日返工都畀人鬧，所以試過委屈到閂埋門喊。第二次係廿多年前媽媽過世，肥亨深感樹欲靜而風不息，因此傷感落淚。第三次則係肥亨臨辭官前去台灣為舅父（即曾志偉父親）慶祝九十一歲生日，佢當時有感為官六年因政治敏感，未有赴台探望一直對佢一家照顧有加嘅舅父，所以慚愧落淚。

講起去台灣，當時外界揣測佢在位期間頻頻秘密訪台而被迫辭職，肥亨尋日斬釘截鐵話：「無稽之談！」佢話，當時係獲特首批准訪台，仲笑指自己才是首位以非官方身份訪台嘅香港高官。即係比其他人行前咗一步喇。