尋日大熱天時，新鴻基地產非執行董事郭炳湘同太太李天穎去到灣仔鵝頸橋橋底，出席婦協郭得勝服務中心嘅動土儀式，認真唔話得。今次係發生郭炳湘「不愛江山愛美人」事件後，夫婦首次並肩出席公開活動。
郭大少尋日心情靚爆，即使主禮場地無冷氣，嘉賓焗到流晒汗，着住老西嘅佢依然笑足全場，李天穎寸步不離黐實老公，更因為要追住老公，搞到險些跌倒，幸好佢反應夠快，一手扶實老公強壯嘅臂彎，至可以安然無恙。
話睇情況重掌新地
郭大少睇嚟有備而來，幾乎有問必答，就算有人問佢幾時重返新地做主席，佢都好坦白：「呢個唔知喎，睇情況喇！」被問及健康問題，佢答得好親切：「問我健康狀況係點？我諗點都唔差過你噃！」佢又被問及新地會唔會勾出九肚山地皮，佢話會試吓嘅。郭大少又睇好本港下半年樓市，話仍會穩步發展，至於內地市場，佢話北京、上海、成都及深圳等大城市，只要有合適地點，都會考慮。
豪捐千萬擴建中心
講番天橋底嘅婦協中心，係婦協主席林貝聿嘉去年喺一個場合主動同郭大少提出，話婦協會址殘舊，需要翻新，大少聽到後返屋企同媽媽鄺肖卿商量，決定由郭得勝基金撥出一千萬大元，更承諾參與設計同動工。
林太同卓妮講，佢話本來只係要求郭炳湘捐出八百萬元，大少豪氣地捐夠一千萬元，預計工程一年後完工，中心擴建後面積大一倍，並將重新命名為香港婦協郭得勝服務中心。卓妮記得，呢個中心本來叫如心服務中心，係已故華懋主席龔如心十年前捐款五百萬元興建。林太話今次中心擴建，龔如心已經過身，林太見龔家打緊官司，唔方便開口打擾，所以轉而敲郭家門，咁啱郭老太千金郭婉儀係婦協首席名譽會長，有「自己人」幫口，當然水到渠成喇。
不過林太補飛話：「我哋無忘本㗎，仍然記得龔家嘅恩惠。」佢話，如心服務中心嘅招牌仍會保留，擴建工程亦已知會龔家喎。
卓妮