不過做戲還做戲，現實生活點指兵兵、點指賊賊，撞正賊人固然冇運行，但遇到警察都唔好開心住，因為佢哋嘅行徑有時同賊人都冇乜分別嘅咋！

日前元朗馬田村就上演咗場兵賊不分嘅事件。話說有兩兄弟半夜三更聽到樓下傳來爆門聲，當堂嚇到冇晒睡意，雖然話依家係鬼月啫，都冇理由猛到會爆門㗎？唔使講，九成九係賊佬入屋啦！

兩兄弟落樓想睇吓發生乜嘢事，只見一批大漢衝咗入嚟，仲大嗌：「唔好郁！」說時遲那時快，兩兄弟報稱畀人不分青紅皂白邊打邊盤問，呢個時候，佢哋先至意識到呢班不速之客唔係賊佬，而係差人！

大班探員摷咗一輪冇發現可疑物品，疑線報失準收錯風，好人當賊辦，sorry都唔講聲就拍拍屁股拉隊離場。不過兩兄弟就慘咯，無端白事被人拳打腳踢五分鐘，真係飛來橫禍，哥哥更懷疑被人打到右耳膜都穿埋。

成個過程中，探員唔單止冇表露身份，又冇出示搜查令，被打兄弟怒斥：「差人同賊無分別！」

喂！差人執法冇人話唔啱，但都要依正程序㗎，都唔可以隨便打人㗎！內地公安被指屈記者藏毒，都未至於要郁手打人啩？估唔到香港警察仲威過內地公安，屈市民藏毒不特止，仲涉嫌打到人哋連耳膜都穿埋，有冇再離譜啲呀！

鬼咩，佢哋有個好使好用嘅擋箭牌，次次有警察涉嫌濫權，警方發言人又係例牌嗰句，話投訴警察課喺度調查中，今次亦唔例外。有負責保安事務嘅立法會議員表示，今次事件令到市民好驚嚇，警方實在係難辭其咎，應該盡快掌握基本事實作出公布，如果程序有不當之處，好應該向公眾致歉，唔可以下下用投訴警察課作擋箭牌。

話時話，最近啲差人負面新聞多多，好似話涉嫌粗暴對待性工作者兼食霸王餐、洩漏臥底以及報案人資料、三句唔埋兩句就剝光豬搜身。當中最匪夷所思嘅係，有個淫警竟然喺警署認人房強姦及非禮女報案人，真係一百歲唔死都有新聞呀！

最好笑嘅係，呢班差人見到小市民就話惡死騰騰，但一遇到啲江洋大盜就即刻腳仔軟，嗰支手槍即刻變成善良之槍。日前咪試過有個老差骨拔槍阻止賊人偷車，巴閉囉，佢連開三槍，竟然一槍都打唔中，自己仲扭傷腳添。唉，差佬自己都保護唔到，試問點儆惡懲奸呀？

物必先腐而後蟲生，今次事件反映警察內部管理亂到七彩，由上到下從來冇諗方法改善，一味只係掛住為自己爭取薪酬福利，郁啲就威脅要遊行，連最基本嘅紀律都蕩然無存。計功夫茶話齋，再係咁落去，不如搵駐港解放軍出嚟維持秩序，維護法紀，唔使小市民終日擔驚受怕！