呢嗱，前日之嘛，港鐵九龍灣站作為奪命機關嘅熱門勝地，又有人透過無遮無掩嘅月台玩甩繩笨豬跳。一名懷疑精神有問題嘅男子，趁列車埋站之前跳落路軌，好彩落點係中間凹陷嘅救命槽，只係被列車撞傷，並無生命危險。

九龍灣站到底有幾熱門？犀利咯，墮軌事故六個月以來已經有四宗，平均個半月就有一宗。對上一宗更加富於戲劇性。七月二十六日夜晚，二十歲男子喺港鐵樂富站遇到一年前分手嘅舊女友同新男友言談甚歡，男子妒火中燒，進入車廂不停辱罵前女友，去到九龍灣站將對方推落車，出手揸頸被途人制止之後，情緒失控嘅男子一嘢跳落路軌。又係大話夾好彩，當時冇列車經過，否則即使唔死，都要唱番一曲《為愛情受傷》。

講咗咁耐，大家梗係以為功夫茶強烈要求港鐵公司盡快加裝月台幕門嘞，唔好再罔顧乘客安全。冇錯，月台幕門係應該盡快加裝嘅，不過只係講啱咗一半。喂，你以為有幕門就萬事大吉咩？咪咁天真啦，就算有幕門，港鐵公司一樣可以罔顧乘客安全！

話說八月二十四日晚上六點幾，有一列由尖東開往紅磡方向嘅列車，車長竟然喺月台幕門尚未關上嘅情況之下開車，有乘客誤以為幕門未關即係可以如常登車啦，正想步入車廂之際忽然見到列車開動，嚇到驚惶失措。同樣係大話夾好彩，當時位處車尾嘅另一名車長夠晒機警，發現月台幕門未關，即刻通知車頭嘅車長，而月台上面嘅職員亦按動緊急煞車掣，列車啱啱離開月台馬上停低，咁先至冇爆大鑊咋。

講到呢度，大家明唔明功夫茶想講乜？想講嘅係，月台冇幕門固之然係死，如果港鐵辦事作風係顛三倒四鬼五馬六亂七八糟，其實月台有幕門一樣係死。打個譬喻，你屋企安裝咗固若金湯嘅鐵閘，賊佬完全冇辦法入屋，之不過你原來係失魂魚，返屋企永遠唔識得鎖閘，結果咯喎，賊佬如入無人之境，輕則謀財，重則害命！

唉，港鐵出事都唔係第一次㗎嘞，點解犯完又可以再犯嘅呢？話口未完，東涌線居然有列車喺欣澳飛站，害到二十名乘客被迫搭回頭車。都係嗰句啦，慈母多敗兒。特區政府作為港鐵大股東，即係佢老母啦，而呢個慈祥老母又好鬼死溺愛縱容，阿仔餐餐闖禍，阿媽永遠輕饒，咁咪縱出一個敗家仔囉。

計功夫茶話齋，擒賊先擒王，你想港鐵改善服務質素咩？不如學一學爭取增加生果金嘅公公婆婆，一於去禮賓府打小人！