廣深港高速鐵路香港段工程快將動工，但受影響土地業權人嘅賠償仲未傾掂數，特別係石崗菜園村村民不遷不拆嘅訴求，政府好似聾耳陳咁當聽唔到。擔大旗拆彈嘅鄉議局專業事務委員會主席劉業強，尋日再落元朗八鄉諮詢居民意見，菜園村代表仍然堅持立場，唔講賠償，只要求劉業強幫手邀請運輸及房屋局局長鄭汝樺（Eva）到菜園村當面對質。
原來菜園村居民九個月前已要求Eva見吓村民，但Eva一直無動於衷，有時間放兩星期大假去北海道自駕遊，都無時間坐車入元朗聽居民意見，將個炸彈拋畀鄉議局。菜園村關注組成員話，希望Eva到菜園村同居民真情對話，仲話會煲定啲白花蛇舌草畀Eva清熱解毒，等Eva攞個良心向居民交代清楚。
劉業強即場拍心口應承幫手約見Eva，稍後仲會整理好受影響人士意見，向政府提交一份申訴書，希望政府有新思維妥善解決事件；佢話如果政府搞好今次賠償，日後新界區其他基建發展，相信會好辦得多。劉業強初挑大樑漸有表現，開始有老父劉皇發嘅影子，究竟能否接棒，大家就拭目以待嘞！