東亞運火炬接力跑將於明日（廿九日）進行，但大部分嘅市民都似乎都對今次東亞運活動冇乜特別大嘅興趣，搞到冇電視台願意免費直播接力跑全程，令康文署要以半賣半送嘅條件，批畀無綫製作同直播整個接力跑同之後嘅倒數晚會，因而鬧出喺電視城進行最後一棒接力嘅笑話。
警方亦唔睇好當日會有好多市民到場圍觀，只派出約八百名警員維持秩序，比去年嘅奧運火炬接力足足少咗四分之三。
依家改咗喺金紫荊廣場舉行嘅接力跑，原先設計係由政務司司長主禮，但唐英年當日不在香港，理應擔任署理司長嘅孫明揚亦外遊未返，最後要搵政制及內地事務局局長林瑞麟頂上。
最令人失笑嘅係，當局見去年嘅奧運火炬接力跑咁受示威者歡迎，今次特別設置咗九個示威區招呼佢哋，點知至今重未收到任何示威申請。
香港又名「示威之都」，唔少人當示威係運動，依家連呢批職業示威者都睇唔上今次接力跑，東亞運籌委會真係要好好檢討吓。