我哋前日寫過自由黨現有三名立法會議員，下屆立法會選舉好可能會放棄轉戰地區直選嘅大計，繼續留守功能組別，只會派啲新人同區議員挑戰直選。去年落選前力撐強攻直選嘅前自由黨主席田北俊，就好支持該黨嘅新策略，認為經過多年嘗試，都係發覺該黨嘅工商界理念同地區直選好難共存，需要重新部署同做好分工。
我哋尋日喺香港會門口撞到田少，出身工商界、喺直選中贏過亦輸過嘅佢，大呻香港選民至今都分唔清立法會同區議會嘅功能，唔了解前者應該關注處理全港性同政策性議題，好難好似啲區議員咁日日喺地區打躉，直接為選民解決啲地區性問題，尤其係對於佢哋呢啲擅長經濟金融政策嘅工商黨，就更難兩者兼顧。
不過田少話自由黨並非全面撤出直選，只係會做好啲分工，支持真正有興趣同熟悉地區問題嘅黨友，參與區議會甚至立法會直選，現有三名功能組別議員就專注啲全港性同政策性議題。喺領導層方面，佢細佬田北辰會花多啲精神搞地區，現任主席劉健儀就繼續做立法會「Bill（草案）王」。咁田少本人呢？佢話自己只會喺背後做顧問，力撐田二少同劉健儀中興自由黨，唔會食言走返上最前線打仗！