香港各界婦女聯合協進會近日十分活躍，尋日就舉行記者會，講十一嘅連串活動，婦協主席林貝聿嘉預告話，今晚（廿八日）喺會展舉行嘅「紫荊吐艷慶歡騰」聯歡晚會有二千人參加，仲有精彩表演，唔睇就走寶喎。
林太咁有信心，梗係要問吓係咩表演啦。點知林太同基本法委員會副主任梁愛詩都話要賣個關子，唔肯透露表演詳情，只係話已經苦練好幾個月，流咗唔少汗水，從未表演過，到時仲有幾百人一齊表演添，最後詩姐畀多一個提示，就係「臨老學吹啲打」。早前聽聞佢哋會表演打山西鼓，大家不妨拭目以待。
既然大家都咁神秘，不如講吓依家最潮嘅話題「o靚模」啦。林太話時代進步，o靚模現象已經係一個趨勢，不過呢啲急就章、以為可以一步登天嘅心態唔係太好，仲話「此風不可長」！
詩姐就話以o靚模作為事業好可惜，一來o靚模好商業化，二來年輕係學習嘅時候，應該認真學習，好好裝備自己，咁至對未來發展有幫助。佢仲語重心長話：「o靚模唔可以當終身職業。」不過，佢都承認呢種風氣禁無可禁，只可以引導青年人行正路。
咁又係，老咗又點做o靚模呢？