副局長同政治助理去年登場，政務官出身嘅譚志源，憑其熟悉政府運作嘅優勢，迅即跑出半個馬鼻，不時代表一班政治新丁發言，同時又扮演特首辦主任與副局、政助之間嘅橋樑職能，協助聯繫工作，「班長」之名不脛而走，久而久之，呢個虛擬職位亦形成一種制度。Raymond譚執掌特首辦，升任「校長」，本來打算蕭規曹隨，為懸空嘅班長之位尋覓接班人，連方法都敲定，推行一人一票選舉，仲認真到實行暗票制，點知白費一番心機。

政府消息解釋，副局「班長」並非真正嘅編制職位，更加唔係副局之首，只係副局政助上任之初，搵一個人做義工，方便各人聯繫，依家副局政助嘅工作已漸上軌道，平日以電郵通訊亦相當便捷，所以再毋須一個咁嘅角色嘞。照咁講，取消「班長制」嘅主因，係時移勢易，從技術層面着眼，認為無此需要。不過，我哋聽到嘅，卻係另一個版本。

據了解，Raymond譚想繼續行「班長制」，有意以暗票形式選班長嘅消息曝光後，令呢個「職位」人氣急升，有部分副局認為，日後無論邊個當選，頭上都自然被戴上「最強副局」嘅光環，形象儼如副局之首，在同僚之間別具威望，咁就唔係好妥，一嚟有違七名副局職級相同、平起平坐嘅原則，二嚟選舉為副局製造不必要壓力，所以紛紛向Raymond譚建議取消班長制度。

怕影響明年評核

眾所周知，一班副局政助明年中面臨一次中期表現評核，成績表由港府高層評分，但隨時由社會判刑，事關喺今時今日嘅政治環境下，副局政助嘅薪酬變化，勢難逃過公眾耳目，所以副局之間依家開始要發力爭取表現，不過如果其中一位副局做咗班長，無形中有更多表現機會。明知自己無緣做班長嘅副局們，又點會陷自己於不利局面呢？