做公職回饋社會

Andrew係上海青聯常委，外祖公係上海已故紙業大王徐大統，同上海淵源極深，由佢擔任滬港交流促進會主席，順理成章，佢搵埋內地「三毛之父」張樂平外孫詹勝做副主席幫手，算係公職生涯中首次擔正演出。不過，Andrew似乎仲未習慣高調曝光，前晚喺香港青聯新一屆領導層就職儀式上，叫卓妮放佢一馬，話暫時專心發展事業，做公職純粹想回饋社會，愈低調愈好。

係喎，Andrew間會計師行開業已經三年，母親范太有冇從中教路？Andrew話，兒子創業，范太當然有關心，不過，范太唔係生意人，平時又咁忙，好似前晚咁，范太就上咗北京開全國人大常委會會議，邊有時間教路吖。Andrew本身讀法律，九四年家姐范凌華患急性腎衰竭，范太須進行捐腎手術救女，喺加拿大讀書嘅Andrew毅然返港陪伴家人，又留港讀書，入港大攻讀會計，以繼承父親衣鉢，其後更加一邊做嘢，一邊修讀倫敦大學法律學士課程，最終一償心願，攞埋法律學位。Andrew咁叻仔，靠自己雙手打天下，范太可以安樂啦！

卓妮