本文重點
男士愛玩車，莊士集團太子爺莊家彬（Albert）都唔例外，前晚佢以副司庫身份出席香港青聯舉行嘅慶祝建國六十周年及新一屆會董會就職典禮，見佢之前因為返西藏考察，搞到鼻敏感瘦咗成個圈返嚟，但一講開車經，佢即時生猛晒。不過，唔好以為男仔一定鍾意刺激愛揸跑車喎，原來Albert咁大個仔都未試過揸跑車；即使當年去外國讀書，都一樣無作反偷揸，點解咁乖？因為孝順囉！
話說當年佢考到牌要買車，當時莊爸爸大開水喉，仲畀足自主權Albert自己決定買咩車添，Albert當時心中不禁暗叫「筍」，諗住今次可以自己話事啦，點知眉精眼企嘅莊爸爸即時加番句︰「不過從你買咩車，我就可以定性你係咩人！」Albert咁醒目，當然即刻收到爸爸想點啦，最後都係揀咗部穩打穩紮嘅Jeep仔，之後Albert仲發現架車無論落雪定係山路都啱揸，果然冇揀錯。所以話呢，教仔唔係講惡嘅，遇着個高智商嘅囝囝，做爸爸嘅都要用番高智商嘅治方。
傅明憲話索Ｋ如自殺
前晚Albert妹妹莊家蕙都有嚟，仲同Albert緋聞女友傅明憲（GiGi）坐埋一齊，兩個仲鬼咁好傾添。GiGi話依家青少年吸毒問題嚴重，早幾日佢喺Facebook見到段駭人片段，講個細路女為咗五百蚊人民幣同人輸賭吸晒成枱Ｋ仔，傳聞話最後死咗。一向搞開愛護動物工作嘅GiGi就話，Ｋ仔係大象麻醉劑，佢為個女仔大感可惜，覺得佢唔係一時貪玩，簡直係自殺行為，好無知！
卓妮