經過前晚嘅歐聯外圍賽附加賽後，三十二支分組賽球隊全部誕生，歐洲足協會長柏天尼成功扶助弱勢社群，共有八隊「初哥」首次打入改制後嘅歐聯分組賽，不過五大聯賽地位依然牢不可破，十八支球隊悉數入選分組賽，犧牲嘅反而係一啲比上不足、比下有餘嘅二線球隊，而分組賽賽事將於香港時間九月十六日凌晨舉行。

球會仔受惠歐聯改制

歐洲足協會長柏天尼當選後，曾答應讓聯賽水平較低嘅球隊，增加打入歐聯分組賽嘅機會，畀機會呢班弱勢球隊搵真銀，結果有八支初哥得償所願，除禾夫斯堡、標準列治、烏尼雷亞、魯賓卡山及阿爾克馬爾外，連足球水平相對較低嘅塞浦路斯球會尼科西亞、來自瑞士嘅蘇黎世，及匈牙利代表迪比辛，都有機會喺歐聯亮相，並穩袋千五萬鎊（約一億九千萬港元）可觀收入。三十二強分八組， 各組頭兩名將出線十六強。

阿仙奴晉級荷包腫脹

至於前晚最受矚目嘅阿仙奴主場對些路迪，雖然阿仙奴射手尹佩斯、艾沙維等主力放喺後備席，但依然以三比一擊敗些路迪，上半場伊度亞度達施華插水博十二碼，獲球證判極刑，結果親自操刀為球隊領先一比○。

換邊後，今仗踢後上前鋒嘅伊保爾表現出色，為球隊射成二比○，加上後備入替嘅艾沙維再入一粒，阿仙奴最終以三比一擊敗些路迪，兩回合贏五比一晉級。阿仙奴除獲得歐聯基本獎金外，再加埋主場門票收益，最少會有二千萬鎊進帳，呢場勝仗對阿仙奴嚟講可謂非常重要。

不過，些路迪賽後對伊度亞度達施華插水感到相當不滿，要求歐洲足協罰佢停賽。