水務署嘅服務本來已經夠水皮，勢估唔到愈來愈水。以前可能隔一排先至爆一次水管，家陣咯喎，日爆夜爆左爆右爆前爆後爆，總之頻頻密密爆到遍地開花。唔信？不如睇睇最近兩個月嘅輝煌紀錄。

七月一日，中環干諾道中西行線爆水管，導致交通嚴重擠塞。簡直係拉得裙嚟又褲甩，呢頭水務署通宵搶修，嗰頭東行線又爆水管，即係十五小時之內連環雙響爆。

七月五日，荃灣西樓角路爆水管，鄰近商舖生意暴跌九成。

七月十五日，沙田大埔公路爆水管，擾攘二十小時，車龍塞到想死。

八月一日，荔枝角發祥街爆水管；八月七日，沙田銀城街爆水管；八月十一日，旺角洗衣街爆水管；八月二十五日，九龍城賈炳達道爆水管……

如果你以為干諾道中連環雙響爆已經夠黑仔，咁你就要睇睇黑仔之中嘅黑仔嘞。元朗大棠路同一路段嘅水管，居然一個月之內爆咗三鑊，好壯觀咁樣創造連環三響爆嘅奇景。

爆水管有乜問題呀？問題多咯，一來交通擠塞啦，二來浪費食水啦，三來居民缺水啦，四來生意受損啦，五來咯喎，呢個最得人驚，隨時攞你命！

咪以為功夫茶講笑，上星期之嘛，俄羅斯位於西伯利亞地區有一個水電站，由於爆水管導致大量水流湧入機房，造成至少八死十傷，另外五十四人失蹤。至於香港，舊年七月亦有類似險情，藍田將軍澳道山坡上面有一條鹹水管爆裂，大量鹹水夾雜黃泥碎石沖落山，好似山洪暴發咁嘅款，斜坡下面一個由貨櫃改裝而成嘅辦公室首當其衝，好彩工程人員急急疏散走得快咋。

因乜事幹成日爆水管嘅呢？兩個字：老化。水管用咗三十年咯喎，點修點補都冇用。「水皮服務署」其實都知道問題所在，所以一早計劃耗資一百一十四億元分階段更換老爺水管，不過可惜吖，速度慢過蝸牛。現時全港水管總長度係七千二百公里，水務署早於一九九九年已經話要更換其中三千公里水管，你估吓要用幾耐時間呢？原本係話二十年，後來「快馬加鞭」，都要二○一五年先至有望完工。功夫茶懷疑，工程速度慢成咁，完工之後又要從頭換過，因為當初所換嘅水管已經又變得老化。

唉，再係咁落去，可能唔止爆水管，被迫重返七十年代過制水生活嘅受災民眾，有機會激到爆血管！