「恒生一姐」、恒生銀行副董事長兼行政總裁梁高美懿，尋日以港大舊生身份擔任港大新生入學禮嘅主禮嘉賓，佢仲記得一九七五年初入大學時又忙又緊張，開學就成日要去圖書館借書做Project。話明係「一姐」，由細到大讀書一定名列前茅，但原來佢入咗港大之後，因為競爭太大，遇過好多挫折，佢記得有次自己做咗份功課，諗住都應該攞到A+嘅成績，點知最後老師只係畀佢B-，收到成績之後即時心都痛埋，到依家都難忘嗰種滋味。