「可愛」嘅醫管局主席胡定旭、「靚仔」嘅前行會成員陳智思（Bernard）加埋「多計」嘅恒隆地產董事長陳啟宗（Ronnie），三個事業有成但名草有主嘅型男尋日齊齊出席「婦女事務委員會研討會2009」嘅午間講座，與現場百多位女人分享「男性在推動兩性平等的角色」。面對全場有智慧有學識嘅女人，講錯一句分分鐘出唔到門口，但三位「愛妻號」憑住智慧同幽默感，贏得在場女士會心微笑。
肥胡唔知係咪食得好嘢多，把口特別甜，佢先讚女性辦事能力高，繼而解釋醫管局男高層比例較女高層為多，係因為女性做到咁上下就返屋企做更重要嘅事業，結果惟有畀唔係咁叻嘅男人升上去。肥胡呢句說話，完全令想發圍嘅女士即刻順晒氣！氹完在場女士，肥胡順勢向屋企位賢妻送飛吻︰「無論老婆又好，女友又好，都會默默支持男人，我好忙，老婆幫我照顧父母同小朋友，令我無後顧之憂，所以我好感恩。我又成日要去應酬，令我覺得好內疚。」肥胡太太聽到一定甜入心。