做咗八年科技大學校長嘅朱經武，終於喺今個月尾正式離任。臨別依依，朱校長尋日搞咗個傳媒茶敍，同大家分享吓感受，幾十個記者唔放過呢個最後機會，一早到校長宿舍等朱經武，朱校長都好識做，準備咗張巨型紙牌，上面寫住「傳媒情永在」，話要多謝記者咁多年來都錫住佢、關照佢，啲報道都好正面咁話。
其實朱經武來香港做校長之前，香港人應該無咩人識佢，但佢嚟咗之後，人氣力壓其他大專院校嘅校長，仲多次成為全港最受歡迎嘅大學校長，除咗因為朱校長本身平易近人之外，佢嘅公關手腕亦應記一功，好似尋日咁，臨別秋波都仲好關照啲記者，送書畀記者之餘，仲有求必應逐本書簽名；記者話要同佢影相，朱校長亦一一照辦，氹到個個都鬼咁開心。
朱校長話，做科大校長係佢人生嘅高峰，希望將來會喺高溫超導體研究道路上再創頂峰，改善人類嘅生活質素，喺呢度我哋祝願朱校長如願！