早前有人喺報章上言之鑿鑿，話疑似特首候選人、行政會議召集人梁振英（CY）係共產黨員，雖然CY已即時澄清從未入過共產黨，但近日仍然受到狙擊，尋日呢份報章繼續引述一名前港區全國人大代表，直指CY「肯定是共產黨員」，搞到CY無法再沉默下去，尋日喺自己網誌上事先張揚，晚上就上電台節目作出反擊。佢話該名人大代表已澄清無講過有關言論，佢亦多次回應自己唔係共產黨員，但有關報章繼續質疑佢，呢個係質疑緊佢嘅誠信。
佢無奈話，報紙都應該有誠信，如果係都要質疑佢，佢都無辦法證明自己唔係共產黨員，佢仲感慨話：「事件令我想起香港回歸十二年，仲有人用共產黨籍作為武器，去攻擊同抹黑在本港有公職嘅人。」言下之意批評有人借此抹黑佢。
CY更加重提舊事，話曾經有雜誌指某局長係共產黨員，仲教人區分一啲地下共產黨員，不斷散播呢啲恐怖和謠言，CY批評呢啲都係不負責任手法，變成負面和打擊嘅有效工具，亂扣帽子實在好難澄清。佢苦笑話，發明呢個手法嘅人都幾聰明！主持人問佢今次成為攻擊目標，係咪涉及特首選舉？CY就直話直說，話不排除呢個可能性，仲話呢種手法對參選特首嘅人會產生負面影響，睇嚟「好戲在後頭」！