自由黨去年喺立法會直選經歷重挫，黨內就應否撤離直選戰場、只攻取功能組別議席嘅問題，一度引發內訌，其後更出現林健鋒、梁君彥同梁劉柔芬退黨嘅人事動盪風波。不過，自由黨當時堅持，開拓直選嘅決心不變，Miriam同方剛分別部署喺新界西元朗同港島灣仔開地區辦事處，身體力行力撐自由黨走直選路線，外界揣測佢哋二人係為日後殺入地區測試水溫。

忍痛取消地區辦

事隔近一年，自由黨正、副主席嘅直選進退考慮，逐漸有明朗化決定。方剛尋日透露，擬設嘅灣仔地區辦事處，本來連裝修都搞掂，但最近忍痛打消「開舖」計劃，理由好簡單，佢已敲定下屆立法會選舉繼續穩守批發及零售界功能組別，既然明知無暇分身落區見市民，就無謂徒具開設地區辦嘅虛名。

方剛分析，佢嘅批發及零售界、Miriam嘅航運交通界，同埋張宇人嘅飲食界，如果搵到合適接班人，三人出戰直選唔係問題，但如果貿然換人，三席功能組別未有穩勝把握，而三人轉戰直選，又勝負難料，咁一動不如一靜，起碼封咗蝕本門先。方剛又指，自由黨開拓地區，應主力以幫小商戶出頭來爭取認同，事關「派米、辦荔枝團，街坊唔使搵自由黨」。自由黨打起算盤，果然頭頭是道。

交棒後難言穩勝

其實，Miriam同方剛決定穩守功能組別議席，可以係無得揀之中嘅選擇。環顧形勢，方剛去年競逐連任批發及零售界，已遭「假髮大王」趙振國狙擊，政壇早傳，裕華國貨董事副總經理余鵬春正磨拳擦掌三年後同方剛拗手瓜，余鵬春早前獲全國政協常委陳永棋等力撐，當選香港總商會理事，來勢洶洶；方剛如轉戰直選，呢個位岌岌可危。至於Miriam嘅航運交通界，去年曾考慮交棒前中委、香港物流商會主席羅煌楓，但最終唔成事，羅煌楓早前更轉投林健鋒等人另起爐灶嘅經濟動力懷抱，三年後隨時成為Miriam死敵。如此形勢，自由黨力保招牌，方為上算。