青聯新領導層尋晚喺會展舉行就職晚宴，主席陳仲尼（阿Rock）率領新領導班子亮相，「霍老」霍英東孫兒啟剛同啟山、「彤叔」鄭裕彤長子嫡孫鄭志剛、觀瀾湖太子爺朱鼎健、莊士集團太子爺莊家彬、人大常委范徐麗泰愛子范駿華以及青聯常務副主席葉振都等一眾核心，全部放下身段，一早到場款客，全國青聯副主席廖明宏更專程南下主禮。阿Rock致辭話，青聯未來一年有兩項重點工作，就係繼續做好培養青年人才和推廣國民教育，並針對青年關心領域進行政策研究，將青年心聲帶到社會。

羅范椒芬當年為鄭志剛本書寫過序。	前青聯主席曾智雄（右二）與一眾「後輩」（左起）朱鼎健、曾智明、周沁及姚祖輝齊齊出席晚宴。	左起：李宗德、李家祥、李大壯和陳振彬同青聯各有淵源。

曾智雄撐場念舊

尋晚場面星光熠熠，政府有三位局長到賀，社團場合屬於罕見，其中一位係娥姐，佢○七年仲做緊民政事務局常秘時，阿Rock代表青聯協辦回歸十周年大型活動，二人從此結緣，其後娥姐紮職做局長，舉薦埋阿Rock入城規會。

前高官羅范椒芬則與青聯副主席鄭志剛有淵源，尋晚兩人並排而坐。羅太憶述，幾年前鄭志剛出過一本講述自己喺哈佛大學讀書歲月嘅書，搵羅太寫序，時間耐到連羅太都記唔起當時佢做緊教育署長定係教統局常秘囉。鄭志剛依家係新世界集團執行董事，卓妮梗係要八吓佢點睇佢爸爸鄭家純單緋聞，但佢做足乖仔本分，唔肯代爸爸答；問佢係咪為此怕咗傳媒，佢搖頭話：「唔係怕，係呢排比較忙，飛得多攰啫。」

青聯大日子，唔少青聯出身嘅人都「返娘家」食飯，曾智雄由第一屆做到會員，到第十三、十四屆擔任主席，佢話以前瞓身青聯事務，近年多咗時間打理公司生意，不過，佢話自己永遠都係青聯人，幾忙都要返嚟食呢餐！智雄身體力行撐青聯，尋晚同弟弟智明由頭坐到尾。前會計界立法會議員李家祥就話，青聯九二年成立時，佢做緊青年事務委員會主席，當時佢有份主禮，依家做埋青聯顧問，就算幾忙都要抽空出席，現任青委會主席陳振彬見到李家祥，連聲叫：「前輩！」

卓妮