話說有個男病人十年前證實患咗腦癌，期間試過多次復發，今年七月初因為發燒被送去大埔那打素醫院進行治療。留院期間，出現頭部劇痛、昏睡以及抽搐嘅腦癌病徵，但院方只係處方退燒藥以及抗生素，完全冇人理過佢生咗個腦瘤。

腦瘤呢家嘢，唔講得笑o架，如果公立醫院嘅醫生護士唔知，不如聽吓腦神經專科醫生黃震遐點講啦，佢話：「應該第一時間Check吓個腦，除咗腦瘤仲要排除急性腦炎嘅可能性，如果係腦炎分分鐘死得人！」

最離譜嘅係，醫護人員唔單止冇Check，當病人退咗燒之後，院方已經急急腳要趕佢出院，經過病人家屬反對至話安排送去大埔醫院。以為此地不留人，自有留人處，話晒都叫做有個地方，可以繼續接受觀察同埋治療吖。點知唔轉猶自可，轉咗仲有排驚。

原來一轉就轉咗入去流感病房，嗰度完全冇隔離設施，如果一個唔好彩惹埋流感，咁就弊弊都冇咁弊。嗱嗱嗱，話口未完，卒之搞到病人入院唔夠一日，又再次發高燒，結果又要轉番入去那打素。

話時話，今次病人都算執番身彩o架嘞，功夫茶記得之前伊利沙伯醫院試過將一名患有高傳染性疾病嘅病人，由隔離病房轉入外科病房，竟然冇任何隔離保護措施。病人住多一日半日，容乜易隨時領晒嘢、冇病變有病o架？

以為咁樣將病人踢來踢去已經夠荒謬啦，原來好戲在後頭呀。由於男病人嘅病情每況愈下，佢嘅太太希望那打素醫院將病人轉送去瑪嘉烈醫院腫瘤科接受治療。照計轉送去同屬於醫管局嘅醫院，應該冇理由有難度o架。點知護士竟然夠膽死同病人講：「唔會搵白車送你，你自己簽紙出院，之後再諗辦法去啦。」

唔係啩？醫管局一年閒閒地花咗幾百億公帑，竟然連轉院咁簡單嘅服務都諸多推搪。正所謂醫者父母心，點可以咁官僚，任由一個情況未明嘅病人自生自滅o架？

話分兩頭，又唔怪得呢位護士咁講嘅，或者佢係出自一片好心，好想病人快啲去到瑪嘉烈醫院腫瘤科接受治療都唔定o架。你知啦，依家啲救護車架架都係老爺車，部部入得博物館，三日唔埋兩日就跪低，真係唔多可靠o架咋。

況且呢位護士都好清楚明白，那打素醫院嘅救護車專用車位出名緊張。所謂緊張，唔係話嗰度特別多白車出入，而係呢間醫院嘅救護車專用車位長期畀包括醫生、護士嘅私家車霸佔，話唔埋其中一架就係呢位護士嘅添。

今時今日醫療事故鑊鑊新奇，打錯針、餵錯藥、輸錯血，分分鐘死人，入得去公立醫院預咗冇運行，可以出得番嚟已經係好難得，唔好要求太多咯！