立法會議員葉劉淑儀富貴好多人都知，以前佢做官嘅時候，家住半山區馬己仙峽道，間屋成三千幾呎，同前商務及經濟發展局局長馬時亨等政商界名人都係鄰居。喺美國讀書三年，葉太話生活都變得好簡單，食飯唔一定要鮑參翅肚，唔使做嘢就睇吓Discovery Channel，輕鬆之餘又可以思考做人道理。就係呢種生活改變，○六年返香港前，葉太決定唔搬返去馬己仙峽道，寧願搬到寶雲道一個較細單位住。
雖然呢次係大屋搬細屋，不過間屋都有二千呎，三房兩廳加個露台，環境都唔錯，中層唔係點見到海，但勝在空氣清新、環境清幽。間屋係葉太喺九七年樓市最高峰時買入，市值逾二千萬，本來用作收租，○三年中佢辭職去美國讀書時度過，無理由留一個菲傭喺馬己仙峽道三千幾呎嘅單位度住，於是租約一完就攞番嚟自住。
葉太轉眼喺新居住咗三年，間屋冇乜裝飾，只係掛番幾幅辭官時人哋送畀佢嘅水墨畫。喺書房，葉太掛咗幅「豈能盡如人意，但求無愧於心」嘅書法，令人諗起當年佢為推銷廿三條立法受盡批評嘅情景，果然係往事如煙！