王桂壎近日因狂踩校本自願驗毒計劃而聲名大噪，不過，佢尋日就自爆時至今日仲有唔少人讀錯佢個大名，呢個名仲帶畀佢唔少麻煩添。查實個「壎」字讀音與「圈」字相同，不過唔少人有邊讀邊，錯將佢叫做「王桂勳」。由於工作關係，王桂壎由八十年代起就成日中港兩邊走，大概一個星期去上海兩至三次公幹，但原來個「壎」字喺內地出入境部門嘅電腦顯示唔到，所以佢每次都要搞一大輪先確認到身份。

為咗日後過關暢通無阻，王桂壎最後的起心肝搵出「壎」字嘅同音、同義異體字，仲攞埋本字典上中旅社　職員畀佢改名，最終成功將回鄉證嘅名改做「王桂塤」。不過，王桂壎最近想將上海部老爺車攞去劏時，又畀個名玩起，因為當地劏車要對番車輛登記人嘅姓名，點知王桂壎因為回鄉證個名改咗，結果人哋就點都唔肯幫佢劏車。

講番「友出路」計劃，王桂壎話，下一輪會移師東涌同大嶼山，令偏遠地區嘅學生都可以受惠，律師會仲邀請緊不同界別嘅專業人士加入，以擴大計劃規模。