作為虔誠基督徒嘅前高官馬時亨，早前在電台聲淚俱下力撐正生學生，希望各界要有包容之心，唔好歧視正生學生，但唔知係咪肥亨嘅感染力太強勁，不少商界朋友都受佢感動而主動捐錢畀正生，搞搞吓仲誤傳佢有份捐錢添！肥亨尋日澄清自己從來無捐錢畀正生，事關佢唔清楚正生內部嘅具體運作，但強調撐正生學生嘅立場始終如一。
肥亨剛外遊返港，尋日同太太到福臨門食飯撐枱腳，見肥亨Fit咗好多。對於被傳有份捐錢畀正生，肥亨就回應話，佢知道有唔少商界朋友都受到佢嘅言論感動，自發捐錢支持正生，佢嘅好友黃坤都係因為咁捐咗錢畀正生，但肥亨澄清自己從來冇捐過錢畀正生。談及近日有關正生書院嘅風風雨雨，肥亨就話唔熟悉正生嘅具體運作，所以好難作出評論。
肥亨話，佢由始至終力撐嘅係正生學生，唔係撐營運正生嘅機構或者支持正生搬竇，佢希望有關正生嘅種種是非能早日得以澄清，但無論正生事件之後點發展，都唔好影響班正生學生，希望社會畀呢班後生仔改過自新嘅機會。