有「女電王」之稱嘅中電常務董事阮蘇少湄近日發現患上早期乳癌，尋日起正式休假醫病。「女電王」尋日主動透過中電公關發布消息，指自己近月經過診斷後證實患上乳癌。統領逾四千二百名員工嘅阮太係中電百年來第一位女當家，處事以果斷、有效率見稱，估唔到佢處理患病消息都快人一步，寧願自己爆料，都唔想外界胡亂猜測。
年屆五十歲嘅阮太多次代表公司就電費問題同政府談判，詞鋒銳利，傑出女性形象深入民心，不過佢拒做工作狂，多年來堅持七點下班，每晚早睡早起，飲食清淡，今次患病，同事都戥佢擔心，但佢本人就好樂觀，話有信心會醫番好，又話暫停職務唔會影響公司運作。
阮太今次休假屬暫時性質，康復後會重返崗位，不過暫時未知放幾耐假。中電方面亦有後着，搵咗營運總裁藍凌志兼任署理常務董事（香港）一職，而核電業務方面，就由企業發展總監及香港核電投資有限公司董事總經理陳紹雄負責。阮太倦極病倒，我哋喺度祝佢早日康復；至於去邊度醫病，公關就話係阮太私隱，唔講嘞。