俗語有云：槍打出頭鳥。距離下屆特首選舉仲有兩年幾，CY已經擺明車馬好似一定會去參選咁，自然惹來是非。日前佢以行會「班長」身份，暗批另一行會成員、工聯會會長鄭耀棠反對高級公務員減薪嘅言論違反行會集體負責制，就畀人翻番佢年前搶閘支持最低工資立法嘅舊帳，質疑佢其身不正冇資格話人，有人仲翻炒佢係地下共產黨員嘅傳言，搞到佢要拿拿臨喺網誌澄清絕無其事。

唔再講棠哥

煲呔曾尋日喺政府總部新翼同港區全國政協委員舉行座談會，搵咗CY做主持，傳媒聞風而至，諗住問番佢批評鄭耀棠單嘢。CY進入會場前拋低咗句：「等我入咗去先喇！」大家以為佢會議後再講，點知會議結束後，一眾傳媒喺新翼同中座門口苦候咗差唔多成粒鐘，都等唔到佢現身，新翼一向四通八達，佢要避記者，話都冇咁易啦。其實CY咁做有佢嘅苦衷，事關再批棠哥，只會火上加油，令特區政府更加尷尬，講到佢自己嗰筆，就更加無言以對，所以都係避得就避！